The beginning of our relationship was magical — it all felt like a movie.
Pehli baar ek cold-hearted, arrogant, aur ziddi ladke ko ISHQ hua. Sab kuch sapna sa lag raha tha.

Pehli baar kisi ko dekh ke dil muskurane laga.
Woh pehla DM, woh random baatein, aur dheere dheere tera mera favourite insan ban jaana — yeh sab abhi bhi sapne jaisa lagta hai.

Har choti si baat pe tera hasna, apne hi gande jokes pe muskurana, mere flirts pe tere dry replies, calls pe shaklein banana, mera tujhe chidhana — yeh sab meri zindagi ke sabse khoobsurat pal hai.

Tu meri comfort thi, meri peace, meri duniya ban gayi thi.
Tere saath scooty pe bitaaye har pal mere dil ke sabse kareeb hai.
Aaj bhi jab meri scooty Vishal ke saamne wali red light pe rukti hai, toh lagta hai abhi tu kahegi:
“Dev, kisi aur raaste se le chal, papa dekh lenge.”

Tera har baar mere “Kya khayegi Geeti?” pe “Mujhe bhookh nahi hai, Dev” kehna…
Har date ke baad ghar pahuchte hi “Dev kya kar raha hai?” poochhna…
Har do minute me lipgloss lagana…
School ki break me kabhi bhi time se neeche na aana…
Aur fir kabhi randomly kehna:
“Dev, do you still love me?”

Yeh sab mere kaano mein chhapa hua hai… aur poori zindagi rahega.

Phir humare pyaar ko nazar lag gayi…
Apni duniya ki sabse keemti cheez ko nazarandaz karne laga.
Ek pal tera khayal na kiya… aur usi ladki ka dil tod diya jissne mujhe hasna sikhaya.

Jisne “Sach bol raha hai na?” ki jagah “Pinky promise” sikhaya — usi ka bharosa tod diya.

Jab tu door gayi, tab samjha ki tere bina main kitna adhura hoon.
Jis school ne mujhe tujhse milwaya, usi ke bahar se aake andar jaane ki himmat nahi hui…
Ki kahin woh aankhein, jinhone tujhe itna pyaar kiya, tujhe fir se school dress mein dekh kar toot na jayein.

Banjaare jaisi zindagi ho gayi…
Ehsaas hua ki meri duniya ka rang sirf tujh se tha.

Jo kaan kabhi sochte the “Geeti, tu kitna bolti hai,” ab wahi kaan teri ek awaaz sunne ke liye taras gaye.

Har 11:11 pe tera naam liya…
Har Tuesday Hanuman Mandir mein sirf tujhe maanga…
Tab samjha ki mera dil tujhse kitni mohabbat karta hai.

Roz raat ko teri photo dekh ke dil bhaari hota tha… aankhon mein paani aa jata tha…
Tab laga ki tu meri ZINDAGI hai.

Jab tak tu thi, har cheez mein ek geet bajta tha.
Ab sab kuch chup lagta hai.

Aankhein teri shakal aur kaan teri awaaz sunne ke liye taras rahe hain…

Bas tujhe yeh kehna chahta hoon:
“Aaj bhi meri kahani mein sab kuch tujh se hi shuru hota hai, aur tujh par hi khatam.”